”اے پی پی“ دے زیر اہتمام ڈو ڈینھاں دی بین الااقوامی کانفرنس آف نیوز ایجنسیز داانعقاد صحافت نال وابستہ طلباءسانگے خوش آئند ہے جڑواں شہراں دی پرائیوٹ تے سرکاری یونیورسٹیاں دے شعبہ صحافت دے استاداں تے طالب علماں دا اظہار خیال

اسلام آباد ۔12مئی (اے پی پی)راولپنڈی اسلام آباد دے سرکاری اتے نجی تعلیمی اداریاں دے میڈیا توں متعلق شعبیں قومی خبررساں ادارے ”اے پی پی“ دے زیر اہتمام ڈو ڈینھاں دی بین الااقوامی کانفرنس آف نیوز ایجنسیز (آئی سی این اے) دے انعقاد کوںخوش آئند قرار ڈیندے ہوئیں آکھے جو کانفرنس اچ مقررین دے خیالیں نال میڈیا دی تعلیم حاصل کرنڑ آلے طالب علماں کو سیکھنڑ دے چنگے مواقع ملسن۔ وفاقی دارالحکومت اسلام آباد اچ (اج) اتوار توں شروع تھیونڑ آلی ڈو ڈینھاں دی بین الاقوامی کانفرنس(آئی سی این اے)دے حوالے نال جڑواں شہراں دیاں مختلف نجی تے سرکاری یونیورسٹیاں دے شعبہ صحافت دے استا داں تے طالب علماں رلے ملے تاثرات بیان کریندے ہوئیں آکھے جو ایں ویلھے پورے ملک اچ 30 نجی اتے سرکاری تعلیمی اداریاں اچ صحافت دی تعلیم ڈتی ویندی پی ہے اتے ہر سال ہک ادارے توں 40 دے نیڑے طالب علم تعلیم مکمل کر تے صحافت دے میدان اچ قدم رکھیندن پر انہاں وچوں بہوں گھٹ طالب علم صحافت اچ عملی تقاضیاں تے پورا لاہندن ۔ ایندی ہک وڈی وجہ عملی صحافت دیاں اوہ باریکیاں اتے مشکلات ہن جنہاں کوں اگرچہ عام قارئین، سامعین اتے ناظرین نی سمجھدے تاں ڈوجھے پاسے تعلیم توں نویں نویں فارغ تھیونڑ آلے طالب علم وی اِنہاں بارے نی جانڑدے ہوندے۔ تعلیمی اداریاں دے فیکلٹی ممبراں آکھے جو اِنہاں مشکلاں نال ہک ورکنگ جرنلسٹ ہرروز نبڑدے اتے کئی سال دی محنت دے بعد ا وہ کہیں میڈیا ہاوس دامستقل رکن بنڑدے ہے، دور حاضر اچ معتبر خبر حاصل کرنڑ سانگے بئے توں ودھنڑ ماضی دی نسبت پہلے توںودھ مشکل ہے جیندی وجہ نال صحافیاں کوں اپنڑے ہدف کوںوختی حاصل کرنڑ اچ ودھ محنت اتے جان مار تے کم کرنڑ پوندے، ایں سانگے میڈیا دے سارے شعبیں اچ درپیش چیلنجاں دی تعداد اچ ودھارا تھی گئے۔ عام تاثر ایہ ہے جو موجودہ دور اچ صحافت آسان تھی گی ہے جیرھا جو ٹھیک اندازہ کائنی، ٹیکنالوجی اچ ترقی دی وجہ معتبر خبر لبھنڑاتے جہتاں اچ تکھائی نال تبدیلیاںآندیاں پن۔ ایں سانگے اج خبر وختی ڈیونڑ ہک فن بنڑ گئے جینکوں سخت ریاضت دے بغیر حاصل کرنڑ ممکن نی ۔ ایں تناظر اچ قومی خبررساں ادارہ ایسوسی ایٹڈ پریس آف پاکستان بین الااقوامی کانفرنس آف نیوز ایجنسیز (آئی سی این اے) دا انعقاد کر تے صحافت نال وابستہ اتے مستقبل اچ وابستہ تھیونڑ آلے نویںطالب علماں کوں ہک جامع اتے قابل عمل روڑمیپ ڈتے۔ کانفر نس اچ شرکت کرنڑ آلے پوری دنیا دے ماہرین دیاں آراءاتے قیمتی خیالاں کوں جانڑن، پڑھن اتے سنڑن نال تعلیمی اداریاں دے صحافت توں متعلق شعبہ جات کوں جتھاں نویںآئیڈیاز ملسن ،اتھاں بئے پاسے اوہ خود کوں نویں تقاضیاں مطابق ڈھالنڑ سانگے نویاں راہیں وی لبھ سگسن۔